Nola mugitu da harri hori?

Inork ez ditu inoiz mugitzen ikusi. Baina arrastoek nabarmen erakusten dute mugitu egiten direla. Kalifornia eta Nevada estatuen artean, Death Valley-ko Racetrack Playa-n daude harri ibiltari hauek. Batzuk eskuan hartzeko moduko harkoskoak dira; beste batzuk, berriz, 300 kg-ko harritzarrak. Bi edo hiru urtetik behin baino ez dira mugitzen; eta, arrastoen arabera, batzuk zuzen mugitzen dira, beste batzuk norabidez aldatzen dira, eta badira paraleloan mugitzen diren harri-taldeak ere.

Grabitatearekin ezin azal daiteke mugimendua; izan ere, ez dago aldaparik. Garai batean aintzira baten hondoa izandako lautada bat da Racetrack Playa. Baina, geologoek badute bestelako azalpenik. Arrasto-motagatik argi dute lurzorua bustirik dagoenean gertatzen dela. Hain zuzen ere, hipotesi onartuenak dio lurzorua bustita eta izoztuta dagoenean haize bortitzek mugiarazten dituztela harriak zoru irristakor horretan.