Gizakietan izurriak eragiteko gai diren birusak aurkitu dituzte larrutarako animalien haztegietan

Txinan, larrugintzarako hazten diren mapatxe, bisoi eta arratoi musketadunen haztegietan egindako ikerketa batean, birus arriskutsu ugari aurkitu dituzte; haietako batzuk, gainera, gizakietara jauzi egiteko gaitasuna dute. 

Zehazki, gaitzak jota hil ziren 461 animalien ehunen sekuentziazio metatranskriptomikoa egin dute, eta 125 birus identifikatu dituzte. Haietatik, 36 berriak ziren, eta 39k espezie batetik bestera jauzi egiteko gaitasun handia dutenak, baita gizakietara ere. Adibidez, jatorriz beste espezie batzuk infektatzen dituzten zazpi koronabirus aurkitu dituzte; tartean, saguzarren HKU5 koronabirusaren antzeko bat, bisoi baten biriketan. A gripearen hiru aldaera ere identifikatu dituzte (H1N2, H5N6 eta H6N2), eta hainbat birus zoonotiko, esaterako, Coronaviridae, Paramyxoviridae eta Sedoreoviridae familietakoak. 

Ikertzaileek ohartarazi dute larrutarako animaliak haztea arrisku nabarmena dela zoonosi biralak izateko. Nature aldizkarian argitaratu dute ikerketa.