Haize-erroten sentsoreak bateriarik eta elektrizitate-iturririk gabe elikatzeko sistema bat garatu dute

Turbina eolikoak monitorizatzen dituzten sentsoreak bateriarik eta elektrizitate-iturririk gabe elikatzeko sistema bat garatu du Nafarroako Unibertsitate Publikokoko ikertzaile batek. Teknologia horri esker gailu horiek modu autonomoan hornitzen dira energiaz, eta haize-erroten monitorizazio jarraituan dagoen oztopo nagusietako bat gainditzen da horrela: sentsoreen elikadura elektrikoa. 

Turbina eolikoetan egiturazko akatsak prebenitzea eta mantentzea gero eta beharrezkoagoa da parke eolikoak zahartu ahala. Instalazio horien segurtasuna eta eraginkortasuna bermatzeko, egiturazko osasuna monitorizatzeko gakoa da sentsore mordo bat ezartzea. Gailu horiek dorrean dauden bibrazioak, mekanismoak eta palak etengabe neurtzen dituzte, eta informazio hori denbora errealean bidaltzen dute interpretatzeko eta horrela esku-hartze egokiak ahalbidetzeko. Teknologia horretarako erronka garrantzitsuetako bat sentsore horiek energia elektrikoz elikatzea da, ez baita beti eskura egoten behar diren gune espezifikoetan

J. Carlos Castellano Aldave NUPeko industria-ingeniariak inguruko hondar-energia biltzeko gailuen familia bat diseinatu eta aztertu du bere doktoretza-tesian. Eta, ondorioztatu duenez, gailu horiek energia-iturri fidagarria eta autonomoa eman dezakete aire-sorgailuen egiturazko osasuna monitorizatzeko erabiltzen diren sentsoreentzat. 

Castellanok garatu dituen gailuek inguruko energia biltzen dute, hala nola bibrazioak, beroa eta eguzki-argia, eta elektrizitate erabilgarri bihurtzen dute. Horrek aukera ematen du sentsoreen gisako aparatu txikiak elikatzeko. Proba-fasean, gailu horietako bat dorre eoliko batean instalatu da, eta orain haren funtzionamendua benetako baldintzetan ebaluatzen ari dira nola erantzuten duen egiaztatzeko.