Hilezkortasuna kolokan
2005/07/01 Elhuyar Zientzia Iturria: Elhuyar aldizkaria
Gizakia hil egiten da, hau da, heriotzaren bitartez amaitzen zaio bizia. Eta, ondorengoak izateko, nahitaez hil baino lehen ugaldu behar du. Baina bakterioaren kasuan ezberdina da: ugaltzeko bitan banatzen da, eta sortu berri diren zati biak dira ondorengoak. Jatorrizkoa, bakterio 'ama', ez da hiltzen, baina prozesu horren bidez desagertu egiten da. Horregatik uste izan dute biologoek bakterioak hilezkorrak direla edo, gutxienez, haien bizi-zikloa
ez dela heriotzarekin amaitzen.
Ideia hori kolokan jarri du Frantziako ikertzaile-talde batek. Escherichia coli bakterioarekin egin dute lan, makila- -itxurako bakterio ezagun batekin. Bakterio horrek, erdibitzeko, dituen osagai guztien kopia bat egiten du, eta bi kopia osatu direnean banatu egiten dira fisikoki. Nolabait esateko, ale batek material zaharra jasotzen du eta besteak kopia berria.
Baina, handik aurrera, bi aleak ez dira abiadura berean hazten; material zaharra jaso duena mantsoago hazten da. Neurri batean, metabolismo eraginkorragoa du kopia berriaren jabeak. Behin eta berriz erdibitu ondoren, litekeena da material zaharrena duenak ugaltzeko ahalmena galtzea, eta hiltzera iristea. Bakterioen ustezko hilezkortasuna, beraz, kolokan dago.
