Kolibriak eta landareak, elkarrekiko eboluzioa

Karibeko uharte batzuetan, kolibrien mokoen itxurak eta zenbait lore-barietatek elkarrekin eboluzionatu dutela ondorioztatu dute ikertzaile batzuek. Gainera, Darwinen txontekin gertatzen zen antzera, uhartetik uhartera era desberdinean gertatu da eboluzio hori.

Phil Savoie / Science

Ikertzaileek Science aldizkarian argitaratu dute beren lana. Lehen egindako azterketa batean, Santa Lucia uharteko purpura-koloreko kolibri arrari Heliconia hibai izeneko landarearen barietate bat gustatzen zaiola ikusi zuten; emeak, aldiz, espezie bereko beste barietate bat aukeratzen du, baita arrak baztertzen duen beste espezie bat ere: H. caribea.

Oraingo ikerketan, berriz, Dominicako uhartera jo dute, eta han juxtu aurkakoa gertatzen da: uhartearen behealdean, H. caribea landarearen bi barietate daude, eta sexu bakoitzak barietate bat aukeratzen du; goialdean, ordea, arrak bakarrik jotzen du H. hibai landarera.

Heliconia landarearen barietate bakoitzaren itxura eta sexu bakoitzaren mokoena bat datoz, eta hori kolibriek har dezaketen nektar-kantitatearekin lotuta dago. Hori ikusita, elkarrekiko eboluzioa gertatu dela ondorioztatu dute.