Lau atomoko oxigeno-molekula

Oxigenoaren ohiko formak O₂ eta O₃ dira, hau da, oxigeno-molekula arrunta eta ozonoa. 1920ko hamarkadan teorikoki postulatu zen O₄ molekula ere egon zitekeela eta, 80 urte geroago, Erromako Unibertsitateko ikertzaileek molekula hori detektatu dutela uste dute. O₂ molekulak positiboki kargatu eta konbinatu egin zituzten, gero masa-espektrometroarekin O₄ ioi positiboak sortzen ziren ikusteko. Masa espektrometroak masaren arabera bereizten ditu molekulak, baina nahitaez kargadunak izan behar dute.

Bigarren urratsean, O₄ ioiei elektroi bana gehitu zieten, molekula neutro bilakatzeko, eta, apur bat geroago, elektroiak berriz ere kendu egin zizkieten. Ikertzaileen arabera, O₄ atomo neutroa aski egonkorra bazen, masa-espektrometroaren bidez azken ioi horiek detektatzea posible izango zen. Eta hala gertatu zen. Ikerketa horien atzean, interes teorikoaz gain, interes praktikoak ere egon daitezke, espazio-ontzietarako erregaien alorrean batik bat.