Lurrak Ordoviziar garaian eraztunak izan zituela ondorioztatu dute

Duela 446 milioi urte inguruko kraterrak aztertuta, ikertzaileek ondorioztatu dute Lurrak eraztun-sistema bat izan zuela, gaur egun Saturnok duen antzera. Garai hari Ordoviziarra deitzen zaio, eta inguru hartan hasi ziren landareak lur lehorra kolonizatzen, eta lehen arrain barailadunak agertzen itsasoan. Garai hartako plaka tektonikoen ereduak sortzean, ikertzaile batzuek 21 krater identifikatu zituzten, eta denak ekuatorearen inguruan zeudela ikusi zuten. 

Normalean, kraterrak ausaz banatzen dira planeta osoan. Hortaz, arrazoi bat egon behar zuen garai hartako denak ekuatoretik gertu egoteko. Ebidentzia geologikoetan oinarrituta, eta eredu estatistikoak baliatuta, ondorioztatu dute asteroide bat, Lurretik oso gertu igaro, eta zati askotan txikitu zela. Zati horiek eraztun-sistema bat eratu zuten, eta Lurrera erortzen ziren zatirik handienak sortu zituzten krater horiek. 

Ikertzaileen ustez, Lurraren eraztunek ezagutzen diren beste batzuek baino gutxiago iraun zuten: zenbait dozenaka milioi urte. Horrez gain, iradoki dute kliman ere eragina izango zuela, eta, agian, zeresana izan zuela glaziazio hirnantiarrean; Lurrak azken 500 milioi urteetan izan duen garai hotzenenetakoan, alegia.