Meteorologoen ospakizuna

Hasierako lana IMOk egin zuen; izan ere, nazioarteko lehen lankidetza abiarazi zuen meteorologiaren esparruan, eta ondoren, hainbat meteorologoren belaunaldiek eutsi zioten lankidetza horri. XX. mendeko aurrerakuntzak medio, lankidetza sendotu egin zen eta aurrerakuntzak meteorologia, hidrologia eta zientzia geofisikoetara bideratu ziren. WMO Nazio Batuetako meteorologoen erakunde nagusia da, dudarik gabe, baina nazioarteko lankidetzan murgilduta dago erabat, eguraldiak eta klimatologiak ez baitu muga politiko eta ekonomikorik.

Erakundeko kideen lankidetza boluntarioa eta interes ekonomikorik gabea da, bai zientzia lanean, eta bai bestelako lanetan. Behaketak egiteko nazioarteko elkarlana sustatzea, bildutako datuak estandarizatzea eta trukea ziurtatzea, eta lortutako emaitzak meteorologiarekin lotutako arloetan aplikatzea dira WMOren helburuaka, klimaren azterketa uraren kudeaketan, nekazaritzan, hegazkintzan eta nabigazioan aplikatzea, esate baterako. 185 herrialde WMOren bazkide dira eta Herrialde horietako Zerbitzu Meteorologiko eta Hidrologikoen lankidetza ezinbestekoa da ikerketarako, profesionalak prestatzeko eta teknologia trukatzeko.

WWWko hobekuntza asko GARP (Global Atmospheric Research Programme) programarekin erlazionatuta daude. GARP 1967. urtean jarri zen martxan ICSU (International Council of Science) batzarrarekin elkarlanean eta, klimatologia ulertzeko egin dituen saiakuntza orokorren bitartez, aurrerakuntza handiak lortu ditu. GARPek 70eko hamarkadan eginiko ikerketei esker eguraldiaren zenbakizko iragarpena garatu zen, 8-10 eguneko aurrerapenaz eguraldia iragartzea ahalmentzen duen sistema. Eskala ertainean eta zona mugatu batzuetan eginiko modelizazioek asko lagundu dute klimak eragindako hondamen naturalak ulertzen.

Ekonomikoki, mozkina/kostua erlazioa 10:1 dela onartzen da oro har. Eguraldiak eragindako hondamen naturalak iragarri ahal izatea oso baliotsua da gaur egungo gizartearentzat. Kalkuluen arabera, 250.000 pertsona hiltzen dituzte urtero hondamen naturalek, eta % 70ek jatorri meteorologikoa edo hidrologikoa du. Zorigaitz horiek minimizatzeko Zikloi Tropikalen Programa jarri zen martxan 1971. urtean eta etekina handia izan da.

Baina hondamendiak iragartzeko gaitasunarekin batera, iragarpen horiek prestatu gabeko populaziora iristarazteko bideak hobetu eta azkartu egin dira. Bangladeshen, esaterako, 300.000 lagun hil ziren 1971. urtean zikloi tropikal baten eraginez; 1994. urtean, pareko indarreko beste batek 200 lagun besterik ez zituen hil.

1957/58 bitartean Geofisikaren Nazioarteko Urtea ospatu zen eta, antolatu ziren ekitaldien emaitzetako bat ozono-geruza behatzeko sistema ezartzea izan zen. Behaketasistema proiektu orokor baten barnean jarri zen martxan; Atmosferaren konposizioa eta klimatologia-aldaketak aztertzen zituen proiektuan, hain zuzen. Lan horiei esker, ingurugiroa babesteari buruzko lehen ideiak zirriborratu ziren 1970eko hamarkadan: 1972. urtean Ingurugiroari buruzko Lehen Konferentzia ospatu zen, eta bertan, UNEP (United Nations Environment Programme) sortu zen. 1975. urtean ozono-geruzaren gaineko eraginaren lehen analisia plazaratu zen eta bi urte geroago hura babesteko plana idatzi zen. Helburua ozono-geruza XXI. mendearen erdialderako berritzea zen eta esan beharra dago bidean gaudela. Berotegi-efektua sortzen duten gasak neurtzen ere garai hartan hasi ziren.

Neurketa horien guztien emaitzak ikusita, WMOk klima-aldaketa gertatzen ari zela aldarrikatzeko kanpaina hasi zuen, aldaketaren eragile eta eraginak mundu osora zabaldu beharra baitzegoen. 1976an mundu-mailako Lehen Klima Konferentzia ospatu zen eta WCP (World Climate Programme) jarri zuen martxan. Programa klimaren aldaketa ikertzeko nazioartean egiten diren lanen oinarria da.

Azken bolada honetan "El Niño" efektua izan da WCPren ikergai garrantzitsuenetarikoa. "El Niño"k itsasoaren gainazaleko tenperaturan du isla handia eta, ondorioz, baita kliman ere. Azken urteetan, gainera, bereziki bortitza izan da El Niño".

Elikagaiak ere aztergai

WMOk elikagaien arloan ere aurrerakuntza handiak bultzatu ditu. Kalkuluen arabera, elikatu gabeko 700 milioi lagun egongo dira munduan 2010erako. Klima aztertuta burruka egiten du WMOk arazoaren kontra, meteorologian oinarritutako nekazaritzateknikak garatuz. Teknika horiek herrialde askotan erabili dira jada. Ildo beretik, lehorteak iragartzea basamortutzearen aurkako tresna bilakatu du WMOk. Elikaduraeskasiak basamorturtzearekin duen lotura estua delako, azken honi aurre egitea beharrezkoa da oso.

Etxean, industrian eta nekazaritzan gero eta ur gehiago behar da eta aurki egoera jasangaitza izango da. Kalkulatu denaren arabera, 2025. urtean munduko populazioaren bi herenek izango dituzte ur-arazoak. WMOk herrialde bakoitzeko Zerbitzu Meteorologiko eta Hidrologikoak babesten ditu, ur-iturrien kalitatea eta kantitateari buruzko aholkularitza bideratzeko. Jatorrizko erakundeak, IMOk, era horretako nazioarteko lehen plana 1946. urtean jarri zuen martxan. 1992. urtean gai horren gaineko gailurra antolatu zuten Rio de Janeiron. Baina 1990.eko hamarkada bitarte ez da ziklo hidrologikoaren behaketa-sistema erabiltzen hasi; ur-iturriena, beraz, erakundeak duen lehentasunetako bat da eta gogor egin beharko du lan horretan.

WMOk 50 urtez aritu da lanean eta beste 50 ere beharko ditu egiteko dagoen guztia ikusita. XXI. mendean ere, orain arte egin duen moduan, herrialdeen garapen jasangarriarako bideak eraikitzen jarraitu nahi du WMOk. Helburuetarik asko Nazio Batuen Agenda 21 deritzon dokumentuan daude bilduta: ozonogeruza babestea, klimaaldaketa, basamortutzea eta biodibersitatea dira agenda horretan aurki ditzakegun premiazko arazoak, gizartean ere gai hauek puripurian daudelarik. Hondamendi naturalen kontra borrokatzeko indarrak garapen jasangarrirantz bideratzea, elikagaien segurtasuna, energiekoizpena eta kontsumoa, hirietako poluzioa eta Atmosferaren osasuna ere ez dira ahazteko moduko buruhausteak. Horrez gain, garatutako eta garapen bidean dauden herrialdeen Zerbitzu Meteorologiko eta Hidrologikoen arteko elkarlanerako zubiak eraiki nahi ditu WMOk, zerbitzuok indartzeko legeak bultzatuz eta zerbitzuok ez dauden lekuetan hakakoak sorraraziz. Era berean, informazio meteorologiko eta hidrologikoak nazioartean banatzeko eta guztion onerako direla aldarrikatuz jarraituko du WMOk.

Gara-ko Natura gehigarrian argitaratua