Miller zikloa eztanda-motoreetan

Pistoi eta bielen bidez funtzionatzen duten eztanda-motoreetan errendimendua hobetzeko bi bide egoten dira: konpresio-erlazioa igotzea eta eztanda ondorengo hedapena luzatzea. Lau aldiko motore klasikoetan ordea, konpresio-tasa neurri batetik gora ez dago igotzerik, pistoia goiko puntura heldu baino lehen erregaiaren eta airearen arteko nahasteak berez su hartzen duelako.

Bestetik, hedapen-fasea ezin da konpresio-erlazioa igo gabe luzatu. Izan ere, pistoia konpresioan gora doanean desplazatzen den bolumena eta eztanda egin ondoren erretako gasek beherantz eragiten duten hedapenean desplazatzen dena berdinak dira. Hedapen-erlazioa eta konpresio-erlazioa berdinak dira, beraz.

Oztopo hori injekzioa duten motoreetan Miller zikloari esker saihes daiteke. Mazda etxeak hobetu egin du Miller zikloa, eta funtsean konpresioaldia motzagoa da hedapenaldia baino, zurgapen-balbulak geroago isten direlako.

Eztanda-motorearen lau faseak honela gertatzen dira:

1. Pistoia goitik behera airea zurgatzen hasten da, irekita dagoen zurgapen balbulatik.
2. Pistoia behetik gora hasten denean, pistoiaren ibiltartearen lehen bostenean zurgapen-balbula irekita mantentzen da (2.a. irudia) eta beste lau bostenetan burutzen da konpresioa (2.b. irudia). Beraz, konpresioan ibiltartearen lau bosten erabiltzen dira.
3. Pistoia goian dagoenean erregaia injektatzen da eta pistoiak goitik behera ibiltarte osoan hartzen du erretako gasen hedapen-indarra.
4. Pistoia behetik gora datorrenean, erretako gasak ihes-balbulatik kanpora joaten dira.

Beraz, erretako gasen bultzada konpresio-erlazio berdina duen ohizko motorean baino ibiltarte luzeagoan jasotzen da. Ondorioz, motorearen errendimendua hobea da eta erregai-kontsumoa % 10-15 murriztea espero dute Mazda etxeko injineruek.