Udazkena oparoa

Udazkena uzta jasotzeko garaia izaten da: perretxiko eta onddoak, intxaurrak, babarrunak, sagarrak… eta abar. Batzuk berez ateratzen direnak dira eta beste batzuk guk aldatu edo ereindakoak.

Argazkiko kortaderia edo panpa-belarrak ere udazken-hasiera honetan botatzen du lorea, eta, ondoren, hazi ugari askatzen du. Ez da jatekoa, noski, baina oso deigarria eta oso polita jartzen da urte-garai honetan, bereziki lorategietan, ingurua txukun-txukun zaindua duela. Horretarako ekarria da, jatorriz Panpakoa den landare hau: lorategietako apaingarri gisa.

Baina azken urteotan edozein bide-bazterretan ikusten dugu, bereziki kostaldean. Eta alde txar horixe du: landare inbaditzaile bilakatu dela. Hau da, bertako landareei tokia kendu eta gailendu egiten zaie. Denborak esango digu benetako arazo bilakatuko ote den.

Argazkia: Eneko Imaz Amiano.